دستور کتبی عجیب برای ریش و لباس کارمندان

منابع محلی در ولایت قندهار می‌گویند که طالبان گذاشتن ریش و بستن لنگی را برای کارمندان دولتی در این ولایت اجباری کرده‌اند.

مکتوب صادرشده از سوی مقام ولایت طالبان در قندهار که روز یک‌شنبه، ۲۹ عقرب، در دسترس روزنامه ۸صبح قرار گرفته است، نشان می‌دهد که طالبان دستور داده‌اند تا پس از این کارمندان دولتی در این ولایت ریش بگذارند و لنگی ببندند. در این مکتوب ذکر شده است که تمام کارمندان دولتی در این ولایت باید خود را با مستحبات عیار سازند. در این مکتوب آمده است: «آن عده از مأمورانی که در حین انجام وظیفه ریش خود را کوتاه کنند و یا در هنگام وظیفه لنگی نزنند، از وظایف خود برکنار خواهند شد.» این در حالی است که طالبان از کارمندان ادارات دولتی در ولایت نیمروز، برای نتراشیدن ریش ضمانت گرفته‌اند.

منابع از نیمروز در صحبت با روزنامه ۸صبح گفته‌اند که محکمه طالبان در این ولایت، از تمام کارمندان ادارات دولتی ضمانت گرفته است تا ریش‌های‌شان را نتراشیده و خودشان را مطابق به «سنت پیامبر» و «فرهنگ افغانی» عیار سازند.

قابل ذکر است که با روی‌کارآمدن طالبان در افغانستان، آنان در عرصه‌های مختلف زنده‌گی شهروندان کشور محدودیت‌هایی را وضع کرده‌اند.